តំណាងរាស្រ្តគណបក្សសង្គ្រោះជាតិ លោក ម៉ៅ មុនីវណ្ណ គ្រោងនឹងចុះទៅត្រួតពិនិត្យ មើលទីតាំងដែលវៀតណាម ជីកស្រះចំនួន៥ នៅមូលដ្ឋានភូមិលំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគីរី ក្រោយពីទទួល​បានពាក្យប​ណ្តឹង ពី ប្រជាពលរដ្ឋ ពីការរំលោភបូរណភាពទឹកដី ពីសំណាក់វៀតណាមមកលើកម្ពុជា។ តំណាងរាស្ត្ររូបនេះ អះអាងថា នឹងស្នើទៅកាន់ស្ថាប័​នពាក់ព័ន្ធ និងរដ្ឋាភិបាលឲ្យមានចំណាត់ការក្នុងករណីវៀតណាមរំលោភជីកស្រះនេះ។

បន្ទាប់ពីទទួលបានពាក្យបណ្តឹងពីប្រជាពលរដ្ឋ រស់នៅទីតាំងដែលវៀតណាមជីកស្រះនោះ តំណាងរាស្រ្តគណ​បក្ស​សង្គ្រោះជាតិ ប្រតិភូ និងមន្ត្រីថ្នាក់ខេត្តមួយចំនួន នឹងធ្វើការចុះទៅស្រាវជ្រាវត្រួតពិនិត្យ ព្រំដែនកម្ពុជា និងវៀតណាម នៅខេត្តរតនគិរីនៅថ្ងៃ ទី ០៧ ដល់ថ្ងៃទី ០៩ ខែមិថុនាខាងមុខនេះ។

លោក ម៉ៅ មុនីវណ្ណ បានអោយវិទ្យុសំឡេងយុវជន វីអូវ៉ាយ នៅព្រឹកថ្ងៃទី ៣ មិថុនានេះថា ការគ្រោងចុះ​ទៅត្រួត​ពិនិត្យនេះ​ គឺដើម្បីអោយដឹងជាក់លាក់ជុំវិញករណីនេះ អោយបានជាក់ស្តែង។ លោកបញ្ជាក់ថា បូរណភាព​ទឹកដី​កម្ពុជា ពិតជាសំខាន់ណាស់ ហើយពលរដ្ឋគ្រប់រូបមានសិទ្ធិក្នុងការការពារបូរណភាពទឹកដី ការពារអធិបតេយ្យភាព ស្របតាមច្បាប់រដ្ឋធម្មនុញ្ញកម្ពុជា។

ករណីនេះ អ្នកតំណាងរាស្ត្រគណបក្សសង្គ្រោះជាតិរូបនេះ យល់ថា ទង្វើដែល​សំណាក់វៀតណាមបាន​ធ្វើបែប​នេះ ហាក់​​ដូចជាមានចេតនាក្នុងការរំលោភលើរដ្ឋធម្មនុញ្ញកម្ពុជា តួរយ៉ាងរយៈពេលថ្មីៗនេះ ខាងសំណាក់ភាគី​វៀតណាម​បាន​​ធ្វើរំលោភចូលមកដែនដីកម្ពុជា ដូចជា នៅខេត្តត្បូងឃ្មុំ និងច្រកទន់ហន់ ខេត្តកំពតជាដើម បន្ទាប់ពីមន្ត្រី​រដ្ឋាភិបាល​​កម្ពុជាបានប្រកាស​ក្តែងៗថា ពលរដ្ឋរបស់ខ្លួនទៅធ្វើស្រែចម្ការនៅលើដីគេទៅវិញ។

ជុំវិញពត៌មានដែលបានចុះថា ភាគីវៀតណាមបានជីកស្រះនៅក្នុងតំបន់ហាមឃាត់នេះ មន្ត្រីសម្របសម្រួល​អង្គការ​អាដហុកប្រចាំខេត្តរតនគីរី លោក ឆាយ ធី បានចុះទៅត្រួតពិនិត្យនៅទីតាំងនោះ ហើយបានរកឃើញស្រះចំនួន ៧ត្រូវបានជីកនៅក្នុងតំបន់ហាមឃាត់នោះពិតប្រាកដមែន។

មន្ត្រីសម្របសម្រួលរូបនេះ យល់ថា ការដែរវៀតណាម ធ្វើការជីកស្រះនៅតំបន់ហាមឃាត់នេះ គឺបង្ហាញចេតនា ចង់រំលោភយកទឹកដីក្នុងតំបន់ហាមឃាត់នោះ។ លោកក៏បានជម្រុញអោយមន្ត្រីពាក់ព័ន្ធ ជាពិសេសរាជរដ្ឋាភិបាល​ចាត់វិធានការចំពោះករណីនេះ។

ជាមួយគ្នានេះ គណបក្សសង្គ្រោះជាតិ បានចេញសេចក្តីអំពាវនាវសុំការឧបត្តមជាថវិការសម្រាប់គាំទ្រ ដល់ គម្រោងចុះទៅត្រួតពិនិត្យជុំវិញករណី វៀតណាមជីកស្រះចំនួន ៧កន្លែង ចូលទឹកដីខ្មែរ ស្ថិតនៅក្នុងភូមិលំ ឃុំប៉ក់ញ៉ៃ ស្រុកអូយ៉ាដាវ ខេត្តរតនគិរីផងដែរ។

ដោយលោក ញ៉ែម ប្រសិដ្ឋ