កម្ពុជា-តួកគី ឯកភាពគ្នាលើការពង្រឹងកិច្ចសហប្រតិបត្តិការលើវិស័យមុខងារសាធារណៈ
ក្រសួងមុខងារសាធារណៈ និងឯកអគ្គរដ្ឋទូតតួកគី ប្រចាំកម្ពុជា បានឯកភាពគ្នា លើការប្រឹងប្រែង ដើម្បីកសាងឱ្យបាននូវទំនាក់ទំនង និងកិច្ចសហប្រតិបត្តិការ លើវិស័យមុខងារសាធារណៈ ពិសេសផ្នែកអភិវឌ្ឍធនធានមនុស្ស រវាងប្រទេសទាំងពីរ ដើម្បីរួមចំណែកបន្ថែមទៀត ដល់ការជំរុញ និងលើកកម្ពស់ទំនាក់ទំនង និងកិច្ចសហប្រតិបត្តិការ ដែលមានប្រយោជន៍ទាំងសងខាង សម្រាប់រាជដ្ឋាភិបាល និងប្រជាជននៃប្រទេសទាំងពីរកម្ពុជា និងតួកគី ។
លើកឡើងបែបនេះ នៅក្នុងឳកាសដែលលោក ព្រុំ សុខា រដ្ឋមន្ត្រីក្រសួងមុខងារសាធាណៈ បានជួបសម្ដែងការគួរសម និងពិភាក្សាការងារ ជាមួយលោកស្រី Ayda Unlu ឯកអគ្គរដ្ឋទូតតួកគី ប្រចាំកម្ពុជា នាថ្ងៃទី ០៩ ខែ កក្កដា ឆ្នាំ២០២០ ។
ក្នុងជំនួបនោះ ភាគីទាំងពីរ ក៏បានវាយតម្លៃខ្ពស់ ចំពោះទំនាក់ទំនង និងកិច្ចសហប្រតិបត្តិការល្អប្រសើរ រវាងរដ្ឋាភិបាលនៃប្រទេសទាំងពីរ កម្ពុជា និងតួកគី ក្រោយដំណើរទស្សនកិច្ចជាផ្លូវការ របស់លោកនាយករដ្ឋមន្ត្រី ហ៊ុន សែន នៅ សាធារណរដ្ឋតួកគី កាលពីចុងឆ្នាំ២០១៨ និងទស្សនកិច្ចបន្តមកទៀតរបស់ថ្នាក់ដឹកនាំជាន់ខ្ពស់រដ្ឋសភា និងរាជរដ្ឋាភិបាលកម្ពុជា ក្នុងអំឡុងឆ្នាំ២០១៩ និង២០២០ កន្លងទៅ ផងដែរ ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!