អាជ្ញាធរខេត្តសៀមរាប នឹងរៀបចំព្រឹត្តិការណ៍កំសាន្តក្នុងថ្ងៃឈប់សម្រាករយៈពេល ៥ថ្ងៃខាងមុខនេះ ដើម្បីបង្ហាញសក្តានុពលទេសចរណ៍សុវត្ថិភាព
រសៀលថ្ងៃទី២៧ ខែកក្កដា ឆ្នាំ២០២០ លោក ទៀ សីហា អភិបាលនៃគណៈអភិបាលខេត្តសៀមរាប បានបង្ហាញឲ្យដឹងអំពីគម្រោងរៀបចំព្រឹត្តិការណ៍កំសាន្ត ក្នុងថ្ងៃសងឈប់សំរាក នាពេលខាងមុខ ដើម្បីធ្វើការផ្សព្វផ្សាយសក្តានុពលទេសចរណ៍សុវត្ថិភាព និងជាឱកាសបង្ហាញឲ្យមានការវិនិយោគរួមគ្នារវាងវិស័យសុខាភិបាល និងវិស័យសេដ្ឋកិច្ច ក្នុងស្ថានភាពនៃវិបត្តិកូវីដ១៩ ។
អាជ្ញាធរខេត្តសៀមរាប បានអោយដឹងថា នាថ្ងៃទី១៧ និងថ្ងៃទី១៨ ខែសីហា ឆ្នាំ២០២០ ខាងមុខ ដែលជាថ្ងៃសងឈប់សម្រាកនោះ អាជ្ញាធរខេត្ត ដោយសហការជាមួយសហភាពសហព័ន្ធយុវជនកម្ពុជាខេត្តសៀមរាប គ្រោងនឹងរៀបចំឲ្យមានព្រឹត្តិការណ៍កំសាន្ត ដើម្បីបង្ហាញ និងផ្សព្វផ្សាយអំពីសក្តានុពលទេសចរណ៍សុវត្ថិភាព ដែលគម្រោងទាំងនោះ រួមមាន ៖ ដំណើរកំសាន្តព្រៃធម្មជាតិក្រៅពីប្រាសាទ និងកម្មវិធីកំសាន្តសប្បាយផ្សេងៗច្រើនទៀត ផងដែរ ។
លោក ទៀ សីហា អភិបាលខេត្តសៀមរាប បានលើកឡើងថា រយៈពេលជាងកន្លះឆ្នាំកន្លងមកនេះ ដែលស្ថិតនៅក្នុងវិបត្តិកូវីដ១៩ ខេត្តសៀមរាបបានប្រើប្រាស់អំឡុងពេលនោះ ជាឱកាសនៃរៀបចំត្រៀមលក្ខណសម្បត្តិ ធ្វើឲ្យវិស័យទេសចរណ៍រស់ឡើងវិញ និងប្រសើរជាងមុន ក្រោយពេលដែលវិបត្តិកូវីដ១៩ ស្ងប់ស្ងាត់ទៅវិញ។
លោកអភិបាលខេត្ត បានបន្ថែមថា គោលបំណងសំខាន់ នៃការរៀបចំព្រឹត្តិការណ៍កំសាន្ត ក្នុងថ្ងៃឈប់សម្រាកខាងមុខនេះ វាស្មើនឹងការផលិតស្បតផ្សព្វផ្សាយមួយ ជាមួយនឹងការអះអាងថា សៀមរាប-អង្គរ គឺជាគោលដៅទេសចរណ៍សុវត្ថិភាពរបស់កម្ពុជា ហើយក៏ជាការអំពាវនាវជម្រុញឲ្យមានដំណើរការចរន្តទេសចរណ៍ក្នុងស្រុកផង និងជាឱកាសបង្ហើបឲ្យមានការវិនិយោគរួមគ្នា រវាងវិស័យសុខាភិបាល និងវិស័យសេដ្ឋកិច្ច ក្នុងស្ថានភាពនៃវិបត្តិកូវីដ១៩ ផងដែរ ។
លោកអភិបាលខេត្ត ក៏មានសង្ឃឹមជឿជាក់ផងដែរថា ក្នុងព្រឹត្តិការណ៍ថ្ងៃឈប់សម្រាកនេះ នឹងធ្វើឲ្យបងប្អូនប្រជាពលរដ្ឋខេត្តសៀមរាប នឹងទទួលបានចំណូលមួយផ្នែក ក្រៅពីអាជីពប្រចាំថ្ងៃ និងធ្វើឲ្យជីវភាពបងប្អូនបានធូរស្រាល ក្នុងពេលដែលនៅលើពិភពលោកកំពុងជួបវិបត្តិជម្ងឺកូវិដ១៩នេះ ទៀតផង ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!