តាមរយៈបណ្ដាញសង្គមហ្វេសប៊ុក នាព្រឹកថ្ងៃទី ៣១ ខែ កក្កដា ឆ្នាំ ២០២០ លោក នេត ភ័ក្រ្តា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានថ្លែងសារអបអរសាទរ ខួបលើកទី ១៣ នៃទិវា ឧទ្យានុរក្សាពិភពលោក ( ៣១ កក្កដា ២០០៧-៣១ កក្កដា ២០២០ ) ។ 

លោក នេត ភ័ក្ត្រា បានរំលឹកថា ទិវា​ឧទ្យានុរក្សពិភពលោកនេះ  បានប្រារព្ធឡើងចាប់តាំងពីឆ្នាំ​ ២០០៧ ដោយកំណត់​យក​ថ្ងៃទី៣១ ខែកក្កដា ជារៀងរាល់​ឆ្នាំ ។  ក្នុងនោះ ការចាប់ផ្តើមប្រារព្ធទិវាឧទ្យានុរក្សពិភពលោកលើកដំបូង ត្រូវបានប្រារព្ធឡើងចំថ្ងៃខួបលើកទី១៥ នៃការបង្កើតសហព័ន្ធ​ឧទ្យានុរក្ស​អន្តរជាតិ​ ថ្ងៃទី៣១ ខែកក្កដា ឆ្នាំ២០០៧ ផងដែរ ។

សម្រាប់ប្រទេសកម្ពុជា លោក នេត ភ័ក្ត្រា បានអោយដឹងថា ក្រសួងបរិស្ថាន​ បានប្រារព្ធទិវានេះឡើងជាលើកដំបូងនៅឆ្នាំ២០១៧ ដោយមានការចូលរួមពីបណ្តាស្ថាប័នពាក់ព័ន្ធ អង្គការជាតិ និងអន្តរជាតិ ព្រះសង្ឃ សិស្សានុសិស្ស សហគមន៍មូលដ្ឋាន សាធារណជន និងស្ថាប័នឯកជន នានាយ៉ាងច្រើន ។ 

អ្នកនាំពាក្យរួបនេះ បានបន្តថា ការប្រារព្ធទិវា​ឧទ្យានុរក្សពិភពលោកនេះឡើង  ក្នុងគោលបំណង ៖

- ផ្តល់គុណតម្លៃ និងលើកទឹកចិត្តដល់មន្រ្តីឧទ្យានុរក្ស ដែលបានតស៊ូលះបង់ និង​បូជា​ជីវិត ដើម្បីបុព្វហេតុបរិស្ថាននិងធនធានធម្មជាតិ

- ​លើកកម្ពស់ការយល់ដឹងរបស់សាធារណជនអំពីតួនាទីរបស់មន្រ្តីឧទ្យានុរក្សនៅព្រះរាជាណាចក្រកម្ពុជា អំពីការតស៊ូលះបង់របស់មន្រ្តីឧទ្យានុរក្សក្នុងការថែរក្សា ការពារ និងអភិរក្សធនធាន​ធម្មជាតិ និងបរិស្ថានប្រកបដោយសេចក្តីអង់អាចក្លាហាន។

- ជំរុញ និងលើកទឹកចិត្តសាធារណជនចូលរួមជាមួយនឹងមន្រ្តីឧទ្យានុរក្ស ដើម្បីការពារនិងគ្រប់គ្រងធនធានធម្មជាតិនិងបរិស្ថានប្រកបដោយនិរន្តរភាព ៕