កម្ពុជា-អូស្រ្តាលី បន្តកិច្ចសហប្រតិបត្តិការត្រួតពិនិត្យគ្រឿងញៀនឆ្លងកាត់ព្រំដែន
ស្ថាប័នប្រឆាំងគ្រឿងញៀន របស់ប្រទេសកម្ពុជា និងប្រទេសអូស្រ្តាលី បន្តកិច្ចសហប្រតិបត្តិការត្រួតពិនិត្យគ្រឿងញៀនឆ្លងកាត់ព្រំដែន និងបណ្តុះបណ្តាលធនធានមនុស្ស ។
ការប្ដេជ្ញារបស់ប្រទេសទាំងពីរនេះ បានធ្វើឡើង នាថ្ងៃទី៤ ខែសីហា ឆ្នាំ២០២០ នៅអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ក្នុងឳកាសដែលលោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានទទួលជួបពិភាក្សាការងារ លោក អាន់តូនី ម៉ាខ្វៃ (Anthony maguire) តំណាងនគរបាលសហព័ន្ធអូស្រ្តាលី AFP អមស្ថានទូតអូស្រ្តាលីប្រចាំកម្ពុជា ។
ក្នុងឱកាសនោះ លោក មាស វិរិទ្ធ បានថ្លែងអំណរគុណដល់រាជរដ្ឋាភិបាល និងប្រជាជនអូស្រ្តាលី ដែលបានចូលរួមសហប្រតិបត្តិលេីការងារបង្រ្កាបឧក្រិដ្ឋកម្មឆ្លងដែន ពិសេសបទល្មេីសគ្រឿងញៀនឆ្លងកាត់ព្រំដែន ។
លោក មាស វិរិទ្ធ ក៏បានជម្រាបជូនភាគីអូស្ត្រាលី អំពីភាពជោគជ័យជាបន្តបន្ទាប់នៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់កម្ពុជា ដែលមិនមែនជាសង្រ្គាមប្រឆាំងគ្រឿងញៀន តែជាការប្រមូលផ្តុំនូវកំលាំងសរុបធ្វេីការដោះស្រាយបញ្ហាគ្រឿងញៀន ដែលរាល់ការបង្រ្កាបបទល្មេីសគ្រឿងញៀនត្រូវអនុវត្តស្របតាមច្បាប់ស្តីពីការត្រួតពិនិត្យគ្រឿងញៀន ។
លោក មាស វិរឹទ្ធ បន្តថា សម្រាប់ជនប្រេីប្រាស់គ្រឿងញៀន ត្រូវបានចាត់ទុកជាជនរងគ្រោះត្រូវបានលេីកទឹកចិត្តឱ្យទៅទទួលយកសេវាព្យាបាលអ្នកញៀនគ្រឿងញៀន ដោយផ្អែកលេីសហគមន៍នៅតាមមន្ទីរពេទ្យជាតិ មន្ទីរពេទ្យបង្អែក និងមណ្ឌលសុខភាពដែលក្រសួងសុខាភិបាលបានបំពាក់សេវាព្យាបាលដោយឥតគិតថ្លៃចំនួន ៤៥០កន្លែង ។
លោកអគ្គលេខាធិការរូបនេះ ក៏បានស្នេីសុំឱ្យភាគីអូស្រ្តាលី បន្តជួយដល់កម្ពុជាលេីការងារកិច្ចសហប្រតិបត្តិការដែលមានពេលកន្លងមកបន្ថែមទៀត ។
ជាការឆ្លេីយតប លោក អាន់តូនី ម៉ាខ្វៃ តំណាងនគបាលសហព័ន្ធអូស្រ្តាលីAFP អមស្ថានទូតអូស្រ្តាលីប្រចាំកម្ពុជា បានថ្លែងសាទរនូវលទ្ធផលការងារដែលកម្ពុជាខិតខំសម្រេចបាន ហេីយនឹងបន្តជួយដល់កម្ពុជាលេីការងារបណ្តុះបណ្តាលធនធានមនុស្សជំនាញស៊េីបអង្កេត ចារកម្ម និងការវិភាគព័ត៌មាន និងបន្តការគាំទ្រសកម្មភាពការិយាល័យទំនាក់ទំនងព្រំដែន BLO និងពិសោធន៍គ្រឿងញៀន ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!
