ក្នុងរយៈពេលឈប់សម្រាក ៥ថ្ងៃ ខេត្តព្រះសីហនុទទួលបានភ្ញៀវទេសចរជិត ១២ម៉ឺននាក់
ក្នុងឱកាសឈប់សម្រាកសងថ្ងៃ បុណ្យចូលឆ្នាំប្រពៃណីជាតិខ្មែរ ក្នុងរយៈពេល ៥ថ្ងៃ ខេត្តព្រះសីហនុទទួលបានភ្ញៀវទេសចរសរុបជិត ១២ម៉ឺននាក់ ។
យោងតាមមន្ទីរទេសចរណ៍ខេត្តព្រះសីហនុ បានអោយដឹងថា ក្នុងរយៈពេលឈប់សម្រាកចំនួន ៥ថ្ងៃ ចាប់ពីថ្ងៃទី ១៧ -២១ ខែ សីហា ឆ្នាំ ២០២០ ភ្ញៀវទេសចរ ទៅលេងកម្សាន្តនៅខេត្តព្រះសីហនុ មានសរុបប្រមាណ ១១៦,៥២៩ នាក់ ក្នុងនោះ ភ្ញៀវជាតិប្រមាណ ១១១,៦៥១នាក់ ស្មើនឹង៩៥,៤៤% និងភ្ញៀវអន្តរជាតិប្រមាណ ៤,៨៧៨នាក់ ស្មើនឹង៤,៣៦%។
នៅក្នុងនោះដែរ ភ្ញៀវទេសចរ ចូលតាមព្រលានយន្តហោះចំនួន ៣ជើង មានភ្ញៀវសរុប ២៩១នាក់ ជាភ្ញៀវអន្តរជាតិ ដែលភាគច្រើនជាជនជាតិ ចិន។
មន្ទីរទេសចរណ៍ខេត្ត បានអោយដឹងទៀតថា ភ្ញៀវទេសចរបានទៅកម្សាន្ដតាមបណ្តាកោះនានា សរុបប្រមាណ ៣,៧៥២នាក់ ក្នុងនោះ ភ្ញៀវជាតិប្រមាណ ២,៧១០នាក់ ស្មើនឹង៧២,២៣% និងភ្ញៀវអន្តរជាតិប្រមាណ ១,០៤២នាក់ ស្មើនឹង២៧,៧៧% ។
សម្រាប់ភ្ញៀវដែលទៅកម្សាន្តតាមរមណីយដ្ឋាននានាក្នុងខេត្ត មានភ្ញៀវសរុប ២២,១៤៦នាក់ ក្នុងនោះ ភ្ញៀវជាតិ ២១,០៧៣នាក់ ស្មើនឹង៩៥,១៥% និង ភ្ញៀវអន្តរជាតិ ១,០៧៣នាក់ ស្មើនឹង៤,៨៥% ។ រីឯ ភ្ញៀវដែលកម្សាន្តនៅតាមបណ្តាឆ្នេរនានាសរុប ៨៨,៧១០នាក់ ក្នុងនោះ ភ្ញៀវជាតិ ៨៦,៩២៧នាក់ ស្មើនឹង៩៧,៩៩% និង ភ្ញៀអន្តរជាតិ ១,៧៨៣នាក់ ស្មើនឹង២,០១% ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!