លោក ផៃ ស៊ីផាន អ្នកនាំពាក្យរាជរដ្ឋាភិបាល ថ្លែងថា ឧត្តមក្រុមប្រឹក្សាពិគ្រោះ និងផ្តល់យោបល់ ដែលបង្កើតឡើងក្នុងទិសដៅនយោបាយនោះ គឺមិនមែនជាការកៀងគរគណបក្សនយោបាយនៅក្រៅសភា ដើម្បីគាំទ្រគណបក្សប្រជាជនកម្ពុជានោះឡើយ ។

លោក ផៃ ស៊ីផាន ថ្លែងបែបនេះ តាមរយៈបណ្ដាញទំនាក់ទំនងសង្គមហ្វេសប៊ុករបស់លោក នាព្រឹកថ្ងៃទី ២៥ ខែ សីហា ឆ្នាំ ២០២០ ស្របពេលជាមួយដែលឧត្តមក្រុមប្រឹក្សាពិគ្រោះ និងផ្ដល់យោបល់ បើកកិច្ចប្រជុំប្រចាំឆមាសលើកទី ៤ ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន ។

លោក ផៃ ស៊ីផាន លើកឡើងថា ឧត្តមក្រុមប្រឹក្សាពិគ្រោះ និងផ្តល់យោបល់ ជាយន្តការមួយ ដែលជាការបង្កើតបាននូវវេទិកាប្រាស្រ័យទាក់ទងគ្នាជាភាតរភាព ជាមួយការពង្រឹង និងពង្រីកភាពជាដៃគូរ រួមទាំងការយោគយល់អធ្យាស្រ័យក្នុងកិច្ចការរួមគ្នា ដើម្បីកសាង និងរក្សាអោយបាននូវឯកភាពជាតិរឹងមាំបន្ថែមទៀត។ 

អ្នកនាំពាក្យរូបនេះ គូសបញ្ជាក់ថា នេះជាវប្បធម៌ថ្មីមួយ និងជាប្រវត្តិសាស្រ្តរបស់កម្ពុជា ដែលបង្កើតដោយលោកនាយករដ្ឋមន្ត្រី ហ៊ុន សែន ដែលវេទិកានេះ ជាយន្តការនៃការអនុវត្តវប្បធម៌សន្ទនា សម្រាប់សន្តិភាព និងស្ថេរភាពនយោបាយ ដែលជាផលប្រយោជន៍ជាតិ និងប្រជាពលរដ្ឋ  ដែលនេះជាសសរស្ដម្ភមួយក្នុងគោលការណ៍លទ្ធិប្រជាធិបតេយ្យ ដែលកម្ពុជាកំពុងអនុវត្តន៍ នាពេលសព្វថ្ងៃនេះ ។

សូមបញ្ជាក់ថា ឧត្តមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងតាមព្រះរាជក្រឹត្យចុះថ្ងៃទី៦ ខែកញ្ញា ឆ្នាំ២០១៨ ដោយមានការស្នើសុំរបស់លោកនាយករដ្ឋមន្ត្រី ហ៊ុន សែន ក្រោយពេលបោះឆ្នោតជាតិអាណត្តិទី៦ ឆ្នាំ ២០១៨ ។ ឧត្តមក្រុមប្រឹក្សាពិគ្រោះ និងផ្តល់យោបល់ មានសមាសភាពមកពីគណបក្សនយោបាយចំនួន១៦ ក្នុងចំណោមគណបក្សនយោបាយចំនួន២០ ដែលបានចូលរួមការបោះឆ្នោតជាតិឆ្នាំ២០១៨ ។ ឧត្តមក្រុមប្រឹក្សាពិគ្រោះ និងផ្តល់យោបល់ មានតួនាទីផ្តល់យោបល់ជូនរាជរដ្ឋាភិបាលក្រៅក្របខណ្ឌសភា ក្នុងគោលដៅលើកស្ទួយប្រសិទ្ធភាពការងារ ដើម្បីជាប្រយោជន៍ដល់ការបម្រើសេវាប្រជាជន និងការអភិវឌ្ឍសង្គមប្រកបដោយសក្តានុពល៕