ប្រជាពលរដ្ឋ ៤៨នាក់ នៅខេត្តកំពង់ឆ្នាំង ដែលប៉ះពាល់ផ្ទាល់ជាមួយនឹងសពឈ្មោះ នូ ចុល ដែលស្លាប់ដោយសារជំងឺកូវីដ១៩ លទ្ធផលពិនិត្យសំណាកលើកទី១ បង្ហាញថា អវិជ្ជមានទាំងអស់ ។ 

បើតាមលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង នៅថ្ងៃទី២២ ខែមេសា ឆ្នាំ២០២១ បានអោយដឹងថា  ករណីប្រជាពលរដ្ឋ ៤៨នាក់ នៅភូមិព្រះរាមរង្សី ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ដែលបានទាក់ទងផ្ទាល់ជាមួយនឹងសពឈ្មោះ នូ ចុល ភេទប្រុស អាយុ៥៧ឆ្នាំ ដែលស្លាប់ដោយសារជមងឺកូវីដ១៩  ដែលបានពិនិត្យសំណាក កាលពីថ្ងៃទី២០ ខែមេសា នោះ ជាលទ្ធផលតេស្តសំណាកលើកទី១ បានបង្ហាញថា អវិជ្ជមានទាំងអស់ មានទាំងកូនបង្កើតរបស់សព ចៅបង្កើតសព និងសាច់ញាតិ ផងដែរ។ 

សូមបញ្ជាក់ជូនថា ឈ្មោះ នូ ចុល មានទីលំនៅក្នុងភូមិព្រះរាមរង្សី ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង បានស្លាប់កាលពីយប់វេលាម៉ោង ២:០០នាទី ឈានចូលថ្ងៃទី១៩ ខែមេសា ឆ្នាំ២០២១ នៅក្នុងមន្ទីរពេទ្យបង្អែកខេត្តកំពង់ឆ្នាំង ដោយសារជំងឺកូវីដ-១៩  ៕