លោក ជិន ម៉ាលីន ចាត់ទុករបាយការណ៍របស់អង្គការអ្នកកាសែតគ្មានព្រំដែន ជារឿងដដែលៗ ទោះចេញ ១០ឆ្នាំទៀត ក៏នៅតែដដែល
លោក ជិន ម៉ាលីន អនុប្រធាន និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា បានឆ្លើយតបទៅកាន់អង្គការអ្នកកាសែតគ្មានព្រំដែន ថា របាយការណ៍របស់អង្គការនេះ គឺជារឿងដដែលៗ ហើយទោះបីជាចេញ ១០ឆ្នាំទៅមុខទៀតក៏នៅតែដដែលដែរ។
ការឆ្លើយតបរបស់លោក ជិន ម៉ាលីន បានធ្វើឡើងនៅថ្ងៃទី២៣ ខែមេសា ឆ្នាំ២០២១នេះ បន្ទាប់ពីអង្គការនេះ បានដាក់ប្រទេសកម្ពុជា ជាប់ចំណាត់ថ្នាក់ ១៤៤ ក្នុងចំណោមប្រទេស១៨០ សម្រាប់សេរីភាពសារព័ត៌មាន និងការបញ្ចេញមតិ ។
អ្នកនាំពាក្យគណៈកម្មាធិការសិទ្ធិមនុស្សកម្ពុជារូបនេះ លើកឡើងថា របាយការណ៍របស់អង្គការអ្នកកាសែតគ្មានព្រំដែន គឺជារឿងដដែលៗ ហើយទោះបីជាចេញ ១០ឆ្នាំទៅមុខទៀត ក៏នៅតែដដែលៗដែរ ដោយមានបញ្ហាលើវិធីសាស្រ្តនៃការវាយតម្លៃចំនួន២ ដូចខាងក្រោម៖
១. របាយការណ៍នេះ មើលតែមួយជ្រុងនៃការអនុវត្តវិធានការច្បាប់របស់សមត្ថកិច្ចទៅលើបុគ្គលដែលប្រព្រឹត្តល្មើសច្បាប់តែប៉ុណ្ណោះ ពោលគឺឱ្យតែសមត្ថកិច្ចអនុវត្តច្បាប់ទៅលើអ្នកសារព័ត៌មាន គាត់ចាត់ទុកថា អាហ្នឹងគឺជាការរឹតត្បិតសិទ្ធិសេរីភាពសារព័ត៌មាន។
២. របាយការណ៍នេះ ខកខានពុំបានពិនិត្យមើលលើទិដ្ឋភាពមួយជ្រុងទៀតដែលទាក់ទងនឹងវិជ្ជាជីវៈរបស់អ្នកសារព័ត៌មាននោះទេ ជាពិសេសទាក់ទងទៅនឹងការអនុវត្តសិទ្ធិសេរីភាពអ្នកសារព័ត៌មាន ថាតើវាត្រឹមត្រូវទៅតាមក្របខណ្ឌនៃច្បាប់ និងវិជ្ជាជីវៈរបស់ខ្លួនដែរឬក៏អត់? លោក ជិន ម៉ាលីន សង្កត់ធ្ងន់ថា វិធីសាស្រ្តវាយតម្លៃបែបនេះ គឺមិនត្រឹមត្រូវ ហើយមិនគ្រប់ជ្រុងជ្រោយ និងមិនមានលក្ខណៈជាវិទ្យាសាស្រ្ដនោះទេ ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!