អតីតពលរដ្ឋរស់នៅតាមបណ្តាយផ្លូវរថភ្លើងជាង៣០ នាក់ នៅព្រឹកថ្ងៃចន្ទនេះ បានតវ៉ាដាក់ញត្តិ​នៅមុខ​ធានាគារ​អភិវឌ្ឈន៍​អាស៊ី (ADB) ដោយទាមទារឲ្យធានាគារមួយនេះ ផ្តល់សំណងបន្ថែម ដើម្បីដោះបំណុល និងជុសជុល​ការ​បាត់បង់មុខរបបរបស់ខ្លួន ក្រោយពីការផ្លាស់ប្តូរទីលំនៅ ក្រោមគម្រោងអភិវឌ្ឈន៍ផ្លូវរថភ្លើងនៅកម្ពុជា។

អ្នកស្រី រស់ បុផា តំណាងពលរដ្ឋដែលតវ៉ា បានឲ្យដឹងថា ក្រោយពីការចាក់ចេញពីផ្ទះសំបែងរបស់ខ្លួន តាមបណ្តាយ​ផ្លូវរថភ្លើង អស់រយៈពេល ៤ឆ្នាំនេះ គ្រួសារអ្នកស្រី ក៏ដូចជាពលរដ្ឋទាំងអស់ ត្រូវជំពាក់បំណុលគេ ដោយការខ្ចីលុយគេ យកមកសាងសងផ្ទះសំបែង ព្រោះតែសំណងដែលទទួលបានមិនអាចយកមកធ្វើអ្វីបាន ហើយការចាកចេញនេះ ក៏បាន​ធ្វើឲ្យពលរដ្ឋទាំងអស់ បាត់បង់មុខរបបប្រចាំថ្ងៃរបស់ខ្លួនថែមទៀត។ ដូច្នេះ អ្នកស្រី ស្នើឲ្យធានាគារនេះ ធ្វើការ​គិតគូរ​ពីជីវភាពរបស់ពលរដ្ឋឲ្យបានសមរម្យ ស្រមតាមគោលនយោបាយរបស់ខ្លួន មិនមែនយកពួកគាត់ទៅទុកចោល ដោយមិនគិតពីសុខទុក្ខរបស់ពួកគាត់នោះទេ។ 

យ៉ាងណាក៏ដោយ នៅម៉ោងប្រមាណជាង ៩ ព្រឹក តំណាងធនាគារអភិវឌ្ឍន៍អាស៊ី លោក Janoun Hakim ទទួល​បន្ទុកពិនិត្យគម្រោងរបស់ ADB បានចេញមកទទួលញត្តិពីប្រជាពលរដ្ឋ ដោយបានអះអាងក្នុងរយៈពេល ២០ ថ្ងៃ ថា ធានាគារនឹងធ្វើការឆ្លើយតបចំពោះសំណើរបស់ប្រជាពលរដ្ឋវិញ។ 

អ្នកស្រី ម៉ុច សុខា ជាស្រី្តពិការជើងទាំងសងខាង ដែលបានមកចូលរួមតវ៉ា បានលើកឡើងថា ពួកគេនឹងរងចាំ​ដំណោះស្រាយ​ពីធានាគារអភិវឌ្ឈន៍អាស៊ី តាមការសន្យាក្នុងរយៈពេល ២០ ថ្ងៃ ។ តែបើមិនមានដំណោះស្រាយទេ ពលរដ្ឋទាំងអស់នឹងមកធ្វើ ការតវ៉ានៅមុខធានាគារសារជាថ្មី។ 

សូមជំរាប់ថា កាលពីឆ្នាំ២០១១ ប្រជាពលរដ្ឋដែលរស់នៅតាមបណ្តាយផ្លូវរថភ្លើងក្នុងរាជធានីភ្នំពេញ ប្រមាណជិត ២០០ គ្រួសារ ត្រូវបានផ្លាស់ទីលំនៅមករស់នៅភូមិត្រពាំងអញ្ចាញ ខណ្ឌពោធិ៍សែនជ័យ ចំងាយជាង២៥ គីឡូម៉ែត្រ​ពីរាជ​ធានីភ្នំពេញ ក្រោមគម្រោងអភិវឌ្ឈន៍ផ្លូវរថភ្លើងរបស់រដ្ឋាភិបាល ដែលទទួលបានជំនួយ និងប្រាក់កម្ចីពី​ធនាគារ​អភិវឌ្ឍន៍អាស៊ី និងរដ្ឋាភិបាលអូស្ត្រាលី បន្ទាប់ពីប៉ះពាល់ផ្ទះទាំងស្រុង។ ហើយសំណងដែលពលរដ្ឋទទួលបាន គឺ ក្នុងមួយគ្រួសារ ទទួលបានដី ៧ គុណនឹង១៥ ម៉ែត្រ រួមទាំងសំណងជាលុយ ក្នុងមួយគ្រួសារទទួលបានចន្លេះពី ៣០០ ដុល្លារ ដល់១០០០ ដុល្លារ ទៅតាមទំហំផ្ទះ៕

ដោយកញ្ញា ឡុង គីមម៉ារីតា