ស្រ្តីខ្មែររងគ្រោះ២នាក់ ត្រូវបានបញ្ជូនមកម្ពុជាវិញ នៅរសៀលនេះ
ស្រ្តីខ្មែររងគ្រោះ២នាក់ ដែលត្រូវបានមេខ្យល់នាំយកទៅរៀបការជាមួយបុរសជនជាតិចិន ត្រូវបានបញ្ជូនមកកម្ពុជាវិញ នៅរសៀលនេះ បន្ទាប់ពីស្ថានអគ្គកុងស៊ុលកម្ពុជាប្រចាំទីក្រុងក្វាងចូវ ប្រទេសចិន បានអន្តរាគមន៍។
ក្រសួងការបរទេសកម្ពុជាអោយដឹងទៀតថា ស្រ្តីខ្មែរដែលរងគ្រោះទាំង២នាក់នោះមានឈ្មោះ ងួន ចាន់ណា អាយុ ២៤ឆ្នាំ រស់នៅភូមិតាដែងថ្មី ឃុំពោលម្រឿល ស្រុកបសែត ខេត្តកំពង់ស្ពឺ និងឈ្មោះ ស៊ូ ចិន្ដា អាយុ៣៤ឆ្នាំ រស់នៅភូមិស្ពឺ ឃុំជ័យយោ ស្រុកចំការលើ ខេត្តកំពង់ចាម។
ជនរងគ្រោះបានធ្វើដំណើរ មកដល់អាកាសយានដ្ឋាន អន្តរជាតិ ទីក្រុងសៀមរាប នៅរសៀលម៉ោង៣ ថ្ងៃទី០៥ ខែសីហា ឆ្នាំ២០១៥នេះ។
ជាថ្មីម្ដងទៀត ក្រសួងការបរទេស និងសហប្រតិបត្តិការអន្តរជាតិ បានអំពាវនាវ ដោយទទូចដល់ពលរដ្ឋខ្មែរ ពិសេសនារីខ្មែរដែលជាជនងាយរងគ្រោះត្រូវធ្វើការប្រុងប្រយ័ត្ន ចំពោះការឆបោក អូសទាញ បញ្ចុះបញ្ចូលពីសំណាក់មេខ្យល់ ដែលមានគំនិតទុច្ចរិត ប៉ុនប៉ងនាំបងប្អូនទៅធ្វើការ ដោយភូតកុហកថានឹងទទួលបានប្រាក់ខែច្រើន ឬនាំទៅរៀបការ ជាមួយបុរសជនជាតិចិន នៅប្រទេសចិន។
ដោយ៖ សំឡេងយុវជន
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!