លោកផៃ ស៊ីផាន៖ អង្គការសហប្រជាជាតិ មិនទាន់រកឃើញផែនទី ដែលកម្ពុជាចង់បានយកមកផ្ទៀតផ្ទាត់ព្រំដែន នោះទេ
អង្គការសហប្រជាជាតិ នៅតែកំពុងបន្តរស្រាវជ្រាវរកផែនទីដែលកម្ពុជាស្នើសុំ ដែលពេលនេះនៅមិនទាន់រកឃើញ ប៉ុន្តែផែនទីដែលរកឃើញនោះ គឺជាផែនទី ចំនួន១៨ផ្ទាំង ដែលត្រូវបានកម្ពុជាដាក់ប្តឹងទៅអង្គការសហប្រជាជាតិពីការទំលាក់គ្រាប់បែកលើប្រទេសកម្ពុជានៅក្នុងអំឡុងសម័យសង្គមរាស្ត្រនិយម។ នេះបើតាមការបញ្ជាក់របស់លោក ផៃ ស៊ីផាន អ្នកនាំពាក្យនៃទីស្តីការគណរដ្ឋមន្ត្រី ប្រាប់វិទ្យុសំឡេងយុវជននៅថ្ងៃទី៦សីហានេះ។
លោកផៃស៊ីផាន បន្តទៀតថា ចំពោះសំណើរបស់កម្ពុជាទៅកាន់ប្រទេសបារាំង សុំខ្ចីផែនទីនោះ គឺរដ្ឋាភិបាលបារាំងបានទទួលរួចហើយ ហើយមានសញ្ញាវិជ្ចមានទៀតផង។
សំឡេង៖
លោកនាយករដ្ឋមន្ត្រី ហ៊ុន សែន ធ្លាប់បានណែនាំឲ្យមន្ត្រីរៀបចំទទួលផែនទីចំនួន១៨ផ្ទាំង ដែលបានរកឃើញនៅអង្គការសហប្រជាជាតិ ហើយការទទួលផែនទីនោះទៀតសោធ ត្រូវបើចំហរ ដោយអ្នកពាក់ព័ន្ធនិងបក្សប្រឆាំងក៍អាចចូលរួមបានដែរ ដើម្បីបង្ហាញពីតម្លាភាព។
ចំពោះសំណើររបស់កម្ពុជាទៅកាន់រដ្ឋាភិបាលប្រទេសអង្គគ្លេសសុំខ្ចីផែនទីនោះ លោកផៃ ស៊ីផាន បញ្ជាក់ថា រហូតមកទល់នឹងពេលនេះ លោកមិនទាន់ទទួលបានសញ្ញាណាមួយគួរអោយកត់សំគាល់នៅឡើយនោះទេ។
ក្នុងឱកាសទៅសម្ភោធស្ពានមិត្តភាពកម្ពុជាចិន តាខ្មៅ លោក នាយករដ្ឋមន្ត្រី បានថ្លែងថា រាជរដ្ឋាភិបាលកម្ពុជា គ្រោងចំណាយថាវិការ យ៉ាងច្រើនត្រឹម៥លានដុល្លារ ដើម្បីបញ្ជូនមន្រ្តីគណបក្សនយោបាយ និងអ្នកពាក់ព័ន្ធទាំងអស់សម្រាប់ការធ្វើដំណើរទៅកាន់អង្គការសហប្រជាជាតិ ប្រទេសបារាំង និងប្រទេសអង់គ្លេស ដើម្បីផ្ទៀងផ្ទាត់ផែនទី ដែលកម្ពុជាយកទៅតម្កល់ទុក នៅបណ្ដាប្រទេសទាំងនោះ។ ទន្ទឹមនឹងនោះ លោក បានអំពាវនាវ ដល់ អ្នកដែលមានផែនទីកម្ពុជាត្រឹមត្រូវទាំងអស់ ត្រូវបញ្ជូនមករាជរដ្ឋាភិបាល និងរាជបណ្ឌិតសភា ដើម្បីធ្វើការ សិក្សាស្រាវជ្រាវដោយឯករាជ្យ ដើម្បី ផ្ទៀងផ្ទាត់គ្នាឲ្យបានច្បាស់លាស់ បើខុសថាខុស ត្រូវថាត្រូវ។
បើតាមលោកនាយករដ្ឋមន្ត្រីហ៊ុន សែន ធ្លាប់លើកឡើងកន្លងមក សព្វថ្ងៃនេះការបោះបង្គោលព្រំដែនជាមួយវៀតណាមសម្រេចបាន៨៣ភាគរយហើយនៅលើខ្សែព្រំដែនប្រមាណ១២៦០គីឡូម៉ែត្រ។ ប៉ុន្តែលោកថាកម្ពុជាក៏អាចសើរើបាន បើករណីបោះទៅមានភាពលម្អៀង។
កាលពីអំឡុងពាក់កណ្តាលខែកក្កដាកន្លងទៅ ប្រធានគណៈកម្មាធិការទទួលបន្ទុកកិច្ចការព្រំដែន លោក វ៉ា គឹមហុង បានថ្លែងថា សន្ធិសញ្ញាបំពេញបន្ថែមឆ្នាំ២០០៥ដែលរដ្ឋាភិបាលកម្ពុជានិងវៀតណាមបានចុះហត្ថលេខារួមគ្នា អនុញ្ញាតឲ្យភាគីទាំងពីរគូសចម្លងខ្សែព្រំដែនពីផែនទីបោន១/១០០០០០មកលើផែនទីUTM១/៥០០០០ ដើម្បីជាជំនួយដល់ក្រុមបច្ចេកទេសយកមកអនុវត្តនៅលើដីជាក់ស្តែង។
មាត្រា២នៃរដ្ឋធម្មនុញ្ញកម្ពុជាចែងថា បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានដាច់ខាតក្នុងព្រំដែនរបស់ខ្លួនដែលមានកំណត់ ក្នុងផែនទីខ្នាត១/១០០ ០០០ធ្វើនៅចន្លោះឆ្នាំ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣-១៩៦៩។
អ្នកតាមដានសង្គម លោកកែម ឡី សោកស្តាយដែល ការបោះបង្គោលព្រំដែនបាន៨៣ភាគរយទៅហើយ ដោយមិនបានយកផែនទីដែលតំកល់ អង្គការសហប្រជាជាតិមកប្រើប្រាស់ក្នុងការបោះបង្គោលព្រំដែនជាមួយប្រទេសវៀតណាម។
សំឡេង៖
ចំពោះដំណោះស្រាយទៅលើបញ្ហាព្រំដែន ប្រកបដោយប្រសិទ្ធភាព និងនិរន្តរភាព កម្ពុជា គួរប្រើយន្តការអន្តរជាតិ ដោយផ្តឹងវៀតណាម ទៅតុលាកាអន្តរជាតិ ICJ រឿងព្រំដែន ។ ប៉ុន្តែលោកនាយករដ្ឋមន្ត្រីហ៊ុន សែន បានលើកឡើងកាលពីពេលថ្មីៗនេះថា អ្នកដែលចង់អោយផ្តឹងទៅ ICJ ត្រូវ ធ្វើសារណាពន្យល់ឱ្យបានច្បាស់លាស់ រឿងប្តឹងទៅវៀតណាម។ លោកលើកឡើងថា បើប្តឹងដើម្បីតែចាញ់ក្តីនោះ កម្ពុជាសុខចិត្តមិនប្តឹងល្អជាង។
រហូតមកដល់ពេលនេះ សារធារណៈជន និងអ្នកតាមដានសង្គម កំពុងទន្ទឹងរងចាំ ប្រទេសមហាអំណាច ដូចជា សហរដ្ឋអាមេរិច បារាំង អង្គគ្លេស និងអង្គការសហប្រជាជាតិ ផ្តល់ផែនទីដែលកម្ពុជាស្នើសុំ ដើម្បីយកមកផ្ទៀងផ្ទាត់នឹងផែនទីដែលរដ្ឋាភិបាល បានកំពុងប្រើប្រាស់ក្នុងការបោះបង្គោលព្រំដែនជាមួយវៀតណាម ដែលពេលនេះ ការបោះបង្គោលសម្រេចបាន៨៣%។
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!