នាយករដ្ឋមន្រ្ដីវៀតណាម នឹងដឹកនាំគណៈប្រតិភូមកបំពេញទស្សនកិច្ចផ្លូវការ នៅកម្ពុជា រយៈពេល៣ថ្ងៃ
លោក ង្វៀន សួនហ្វ៊ុក នាយករដ្ឋមន្រ្ដីនៃសាធារណរដ្ឋសង្គមនិយមវៀតណាម នឹងដឹកនាំគណៈប្រតិភូមកបំពេញទស្សនកិច្ចផ្លូវការ នៅកម្ពុជា រយៈពេល៣ថ្ងៃ ចាប់ពីថ្ងៃទី ២៤ ដល់ ថ្ងៃទី២៦ ខែមេសា ឆ្នាំ ២០១៧ ដោយតាមការអញ្ជើញរបស់លោក ហ៊ុន សែន នាយករដ្ឋមន្រ្តីនៃកម្ពុជា។ នេះបើតាមសេចក្តីប្រកាសរបស់ក្រសួងការបរទេសកម្ពុជា នៅថ្ងៃទី២០ ខែមេសា ឆ្នាំ២០១៧។
នៅក្នុងនោះផងដែរ ក្រសួងការបរទេសក៏បានបញ្ជាក់ថា ក្នុងឱកាសដំណើរទស្សនកិច្ចនេះ លោក ង្វៀន សួនហ្វ៊ុក នឹងចូលគ្រាបបង្គំគាល់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រកម្ពុជា នៅព្រះបរមរាជវាំង។ បន្ទាប់ពីនោះ លោកក៏នឹងចូលជួបសម្តែងការគួរសមដាច់ដោយឡែកពីគ្នា ជាមួយលោក សាយ ឈុំ ប្រធានព្រឹទ្ធសភា និងលោក ហេង សំរិន ប្រធានរដ្ឋសភា ហើយនឹងជួបពិភាក្សាទ្វេភាគីជាមួយ លោក ហ៊ុន សែន នាយករដ្ឋមន្រ្តីនៃកម្ពុជា ផងដែរ។
បើតាមសេចក្តីប្រកាសព័ត៌មានដដែលបានឲ្យដឹងថា នាយករដ្ឋមន្រ្តីវៀតណាមរូបនេះ នឹងចូលថ្វាយបង្គំសម្តេចអគ្គមហាសង្ឃរាជាធិបតី ទេព វង្ស សម្តេចព្រះមហាសង្ឃរាជនៃគណៈមហានិកាយកម្ពុជាហើយ នឹងធ្វើជាសហអធិបតីនៅក្នុងពិធីសម្ពោធស្ពានតភ្ជាប់ជ្រៃធំ ខេត្តកណ្ដាល និងឡុងប៊ិញ ខេត្តអានយ៉ាង ដែលនឹងប្រព្រឹត្តទៅនៅថ្ងៃទី ២៤ ខែមេសា ឆ្នាំ២០១៧នេះផងដែរ។
សូមជំរាបថា ដំណើរទស្សនកិច្ចផ្លូវការរបស់ លោក ង្វៀន សួនហ្វ៊ុក នៅកម្ពុជានេះ ស្របពេលនៃការប្រារព្ធឆ្នាំមិត្តភាព ២០១៧ និងខួបអនុស្សាវរីយ៍លើកទី៥០ នៃការបង្កើតទំនាក់ទំនងការទូតរវាងកម្ពុជា និងវៀតណាម ហើយព្រមទាំងរួមចំណែកដល់ការលើកកំពស់ និងពង្រឹងបន្ថែមទៀត នូវចំណងមិត្តភាព ជាប្រពៃណីដ៏ល្អប្រសើរ ភាពជាអ្នកជិតខាងល្អ និងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ។
ដោយឡែងនៅចុងបញ្ចប់នៃដំណើរទស្សនកិច្ចផ្លូវការនេះ ក្រសួងការបរទេស ក៏បានឲ្យដឹងដែរថា ខ្លួនក៏នឹងមានចេញផ្សាយសេចក្ដីប្រកាសព័ត៌មានរួមមួយ ដោយអាចមានការរំពឹងទុកថានឹងមានការចុះហត្ថលេខាលើឯកសារសហប្រតិបត្តិការមួយចំនួនទៀតផងដែរ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!