ភ្នំពេញ៖ បន្ទាប់ពីការប្រកួតជម្រើសក្រុមបាល់ទាត់យ៉ាងស្វិតស្វាញអស់រយៈពេលជាច្រើនខែមក នាថ្ងៃសៅរ៍ ទី៣០ ខែធ្នូ ឆ្នាំ២០១៧ខាងមុខនេះ ការប្រកួតវគ្គផ្តាច់ព្រ័ត្រជើងឯកមិត្តហ្វូនខេមបូឌានលីកនឹងឈានទៅដល់វគ្គផ្តាច់ព្រ័ត្រហើយ។

យោងតាមមន្រ្តីនៃគណៈកម្មការប្រកួតបាល់ទាត់ជាតិកម្ពុជាបានមានប្រសាសន៍ថា៖ ១២ក្រុមខ្លាំងៗអាជិពទាំងអស់នឹងបានប្រកួតគ្នាដើម្បីឈានទៅរកជើងឯកពានរង្វាន់មិត្តហ្វូនខេមបូឌានលីកដែលជាលីកកំពូលកម្ពុជាឆ្នាំ២០១៧។ ហើយនៅថ្ងៃទី៣០ ខាងមុខនេះគឺក្លិបខ្លាំងក្នុងលីក បឹងកេត នឹងជួបជាមួយ ក្លិបក្រសួងការពារជាតិ​ផងដែរ។ អ្នកគាំទ្រជឿជាក់យ៉ាងមុតមាំទៅលើក្រុមសំណព្វរបស់ពួកគេនឹងទទួលបានពានដ៏អស្ចារ្យនេះ។ ជាពិសេសជាងនេះទៅទៀត គឺពានមិត្តហ្វូនខេមបូឌានលីករដូវកាល ២០១៧ ត្រូវបានផ្លាស់ប្តូររូបរាងថ្មីស្រឡាងតាមរចនាបទសខ្មែរតែម្តង។ ដែលនេះជាអ្វីដែលអ្នកគាំទ្រតែងតែទន្ទឹងរង់ចាំនិងចង់ឃើញមករហូត។

ចំណែកឯតំណាងក្រុមហ៊ុនមិត្តហ្វូនបានថ្លែងថា៖ យើងមានមោទនភាពដែលបានចូលរួមលើកកម្ពស់វិស័យកីឡានៅកម្ពុជា ជាពិសេសកីឡាបាល់ទាត់នេះតែម្តង។ ជារៀងរាល់ឆ្នាំយើងតែងតែស្វែងរកក្រុមជើងឯកដែលខ្លាំងបំផុត ឆ្នើមបំផុត និងលឿនបំផុត ដើម្បីលើកពានមិត្តហ្វូនខេមបូឌានលីក។ ឆ្នាំនេះយើងនឹងរងចាំមើលថា តើក្រុម១ណាដែលមានឱកាសលើកពានដ៏មានន័យបំផុតសម្រាប់ការខិតខំរបស់ពួកគេអស់ជាច្រើនខែកន្លងមកនេះពេញមួយរដូវកាល។ លើសពីនេះក្រុមហ៊ុនមិត្តហ្វូនសម្រាប់រដូវកាលឆ្នាំ២០១៧នេះ​ បានសម្រេច និងបរិច្ចាគ ៥០០រៀលរាល់ការជាវសំបុត្រក្នុង១ សន្លឹក ធម្មតា ៣០០០រៀល និងពិសេស ៥០០០រៀល ជូនទៅមន្ទីពេទ្យគន្ធបុប្ផា។ ដូច្នេះ ការជាវ និងគាំទ្ររបស់លោកអ្នកគឺ ជាការចូលរួមចំណែកយ៉ាងធំធេងលើកស្ទួយកីឡាបាល់ទាត់ និងសង្គមរបស់យើង។

គួរបញ្ជាក់ផងដែរថា ការប្រកួតបាល់ទាត់លីកកំពូលកម្ពុជានេះបានចូលរួមគាំទ្រយ៉ាងពេញទំហឹងពីក្រុមហ៊ុនមិត្តហ្វូន ដែលកម្មវិធីទាំងមូលគឺស្ថិតនៅក្រោមឈ្មោះ មិត្តហ្វូនខេមបូឌានលីក ហើយវគ្គផ្តាច់ព្រ័ត្រសម្រាប់ឆ្នាំនេះនឹងប្រព្រឹត្តទៅនៅថ្ងៃសៅរ៍ ទី៣០ ខែធ្នូ ឆ្នាំ២០១៧ នៅពហុកីឡដ្ឋានជាតិ (ស្តាតអូឡាំពិក) ចាប់ពីម៉ោង ៦ល្ងាចតទៅ។ សំបុត្រនឹងមានការដាក់លក់ចាប់ពីថ្ងៃទី២៩ ខែធ្នូ ឆ្នាំ២០១៧នេះតទៅនៅពហុកីឡដ្ឋានជាតិ (ស្តាតអូឡាំពិក) ពីម៉ោង ១១ព្រឹក ដល់ ៨ល្ងាចរៀងរាល់ថ្ងៃ។