អ្នកវិភាគ ថា ការស្នើសុំនីតិសម្បទានយោបាយឡើងវិញរបស់មន្រ្តីបក្សសង្គ្រោះជាតិ ជាការសម្របខ្លួនទៅតាមស្ថានការណ៍ជាក់ស្ដែង នៃនយោបាយកម្ពុជាបច្ចុប្បន្ន
អ្នកវិភាគ ថា ការស្នើសុំនីតិសម្បទានយោបាយឡើងវិញរបស់មន្រ្តីបក្សសង្គ្រោះជាតិ ជាការសម្របខ្លួនទៅតាមស្ថានការណ៍ជាក់ស្ដែង នៃនយោបាយកម្ពុជាបច្ចុប្បន្ន ខណៈដែលតុលាការចេញដីការចាប់ខ្លួនលោក សម រង្ស៊ី ព្រមទាំងមន្រ្តីជាន់ខ្ពស់គណបក្សសង្គ្រោះជាតិ មួយចំនួនទៀត ។
សូមស្ដាប់ព័ត៌មានពិស្ដារ ៖
អ្នកវិភាគឯករាជ្យ លោក ឡោ ម៉ុងហៃ បានលើកឡើងថា ស្នើសុំសិទ្ធិធ្វើនយោបាយឡើងវិញពីសំណាក់អតីតមន្រ្តីគណបក្សប្រឆាំង ជាបន្តបន្ទាប់នៅពេលនេះ ដោយអ្នកទាំងនោះ គិតថាអ្វីដែលពួកគេខិតខំកន្លងមកមិនទទួលបានជោគជ័យ ហើយក៏អស់ជំនឿលើមេដឹកនាំរបស់ខ្លួន ដូច្នេះអ្នកទាំងនោះមានតែសម្របខ្លួនទៅតាមសភាពការណ៍ជាក់ស្ដែងនៃនយោបាយកម្ពុជា បច្ចុប្បន្ន ។
ជាមួយគ្នានេះ លោក ហង្ស វិទូ អ្នកវិភាគបញ្ហាសង្គម និងនយោបាយ មើលឃើញថា ស្ថានភាពនយោបាយកម្ពុជា ហាក់មិនមានអ្វីប្រែប្រួលនោះទេ ដោយលោកលើកឡើងថា អ្វីដែលលោកគិតទុកជាមុននោះ នៅពេលនេះ បានលេចចេញមកហើយ ដែលអ្វីៗទាំងអស់ ជាសេនារីយ៉ូនយោបាយរបស់គណបក្សកាន់អំណាច តែប៉ុណ្ណោះ ។
អ្នកវិភាគរូបនេះ ក៏បានជម្រុញអោយគណបក្សប្រឆាំង គួរតែមានការបន្ទន់ឥរិយាបថបន្តិច ខណៈពេលដែលតុលាការបានចេញដីការចាប់ខ្លួនលោក សម រង្ស៊ី រួមនឹងមន្រ្តីជាន់ខ្ពស់មួយចំនួន របស់គណបក្សសង្គ្រោះជាតិ និងមន្រ្តីមួយចំនួនទៀត ក៏បានធ្វើការស្នើសុំនីតិសម្បទានយោបាយឡើងវិញ ដូច្នេះចង់ ឬ មិនចង់ គណបក្សសង្គ្រោះជាតិ នឹងត្រូវបែកបាក់គ្នា ជាមិនខាន ។
ប្រធានរាជបណ្ឌិត្យសភាកម្ពុជា លោក សុខ តូច ក៏បានឡើកឡើងដែរថា ជាការលំបាកមួយដែលគណបក្សប្រឆាំងមួយនេះ ត្រូវបាត់បង់មេដឹកនាំ ក៏ប៉ុន្តែលោកបញ្ជាក់ថា អ្វីដែលសំខាន់នោះ គឺរដ្ឋាភិបាលបានបើកផ្លូវសម្រាប់អ្នកទាំងនោះធ្វើនយោបាយឡើងវិញ ផ្ទុយទៅវិញ បើរដ្ឋាភិបាលបិទផ្លូវមិនអោយធ្វើនយោបាយទៀតនោះ ទើបជាបញ្ហាប្រឈម ។
ដោយឡែកលោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់វិទ្យុសំឡេងយុវជន នៅថ្ងៃនេះថា កម្លាំងសមត្ថកិច្ចបានត្រៀមខ្លួនរួចជាស្រេច ក្នុងការអនុវត្តតាមដីការចាប់ខ្លួនមេដឹកនាំបក្សប្រឆាំង ក្នុងករណីដែលបុគ្គលទាំងនោះមកជាន់លើទឹកដីកម្ពុជា ។
អ្នកនាំពាក្យរូបនេះ បានបន្ថែមថា ដោយករណីនេះ ជាបញ្ហានយោបាយ ដូច្នេះរដ្ឋាភិបាលបរទេសខ្លះ គេមិនសហការជាមួយនឹងរដ្ឋាភិបាលកម្ពុជា ក្នុងការធ្វើបត្យាប័ណដើម្បីប្រគល់ខ្លួនអ្នកទាំងនោះអោយកម្ពុជានោះទេ ក៏ប៉ុន្តែលោកបានបញ្ជាក់ថា កុកភ្លេចជុង តែជុងមិនភ្លេចកុក នោះទេ ។
គួរកត់សម្គាល់ដែរថា សាលាដំបូងរាជធានីភ្នំពេញ កាលពីថ្ងៃទី១២ ខែមីនា ឆ្នាំ ២០១៩ បានចេញដីកា ដោយបង្គាប់អោយយចាប់ខ្លួនថ្នាក់ដឹកនាំអតីតគណបក្សសង្គ្រោះជាតិចំនួន ៨នាក់ ដែលក្នុងនោះមាន លោក សម រង្ស៊ី លោក អេង ឆៃអ៊ាង លោក អ៊ូ ច័ន្ទឬទ្ធិ លោក តុ វ៉ាន់ចាន់ លោក ឡុង រី លោកស្រី មូ សុខហួរ លោក ហូរ វ៉ាន់ និងលោក ម៉ែន សុថាវរិន្ទ្រ ពីបទរួមគំនិតក្បត់ និងញុះញង់អោយប្រព្រឹត្តបទឧក្រិដ្ឋជាអាទិ៍ ។
សូមបញ្ជាក់ថា ជាមួយនឹងការចេញដីការចាប់ខ្លួនមេដឹកនាំគណបក្សសង្គ្រោះជាតិ ក៏មានមន្រ្តីមួយចំនួននៃបក្សប្រឆាំងមួយនេះ បានដាក់លិខិតទៅកាន់ក្រសួងមហាផ្ទៃ ដើម្បីស្នើសុំសិទ្ធិធ្វើនយោបាយឡើងវិញផងដែរ ។ ដោយក្នុងនោះ លោក រៀល ខេមរិន្ទ្រ អតីតតំណាងរាស្រ្តគណបក្សសង្គ្រោះជាតិ ក្រោយដាក់លិខិតទៅក្រសួងមហាផ្ទៃនោះ នៅថ្ងៃទី ១៨ ខែ មីនា ឆ្នាំ ២០១៩ ត្រូវប្រមុខរដ្ឋស្ដីទី លោក សាយ ឈុំ ផ្ដល់សិទ្ធិនយោបាយឡើងវិញជាផ្លូវការ ។ ដោយឡែកមន្រ្តី ៥ រូបទៀត ក៏បានដាក់លិខិតទៅកាន់ក្រសួងមហផ្ទៃជាបន្តបន្ទាប់ នៅរសៀលថ្ងៃទី ១៨ ខែ មីនា ដដែរនេះ ក្នុងនោះរួមមាន លោក អ៊ូ ច័ន្ទរ៍ត្ន លោកស្រី ទេព សុធី លោក ជីវ កត្តា លោក កង គឹមហាក់ និង លោក ច័ន្ទ សិលា ដើម្បីស្នើសុំនីតិសម្បទានយោបាយឡើងវិញ ក្រោយតុលាការហាមឃាត់ធ្វើនយោបាយរយៈពេល ៥ ឆ្នាំ ៕ អត្ថបទដោយ ធឿន វ៉ាន់សុង
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!