លោកស្រី ម៉ែន សំអន គាំទ្រសំណើរបស់ប្រតិភូខេត្តហ្វូចៀន ប្រទេសចិន លើកិច្ចសហប្រតិបត្តិការ វិនិយោគ វិស័យឧស្សាហកម្ម ពាណិជ្ជកម្ម សេដ្ឋកិច្ច ទេសចរណ៍ វប្បធម៌ និងកសិកម្មនៅកម្ពុជា
ប្រតិភូខេត្តហ្វូចៀន នៃសារធារណៈរដ្ឋប្រជាមានិតចិន ដឹកនាំដោយលោកស្រី ឡេ ជុនម៉ី (Lei Chun Mei) អនុប្រធានគណៈកម្មាធិការអចិន្ត្រៃយ៍សភាប្រជាជន ខេត្តខេត្តហ្វូចៀន បានសុំអោយមានការគាំទ្រពីរាជរដ្ឋាភិបាលកម្ពុជា តាមរយៈលោកស្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច លើកិច្ចសហប្រតិបត្តិការវិនិយោគ វិស័យឧស្សាហកម្ម ពាណិជ្ជកម្ម សេដ្ឋកិច្ច ទេសចរណ៍ វប្បធម៌ និងកសិកម្ម រវាងខេត្តហ្វូជៀន ជាមួយនឹងប្រទេសកម្ពុជា ។
សំណើនេះត្រូវបានលោកស្រី ម៉ែន សំអន គាំទ្រ ហើយនឹងដាក់ជូនប្រមុខរាជរដ្ឋាភិបាល ដើម្បីផ្តល់ភាពកក់ក្តៅដល់អ្នកវិនិយោគរបស់ខេត្តហ្វូជៀនមកកាន់កម្ពុជា ព្រោះនេះជាប្រយោជន៍រួមរវាងប្រទេសទាំងពីរ ក្នុងការអភិវឌ្ឍសេដ្ឋកិច្ច និងជីវភាពរស់នៅរបស់ប្រជាជន ហើយក៏ជាការរួមគ្នាអនុវត្តន៍អោយបានជោគជ័យតាមស្មារតីប្រសាសន៍រួមរវាងប្រមុខដឹកនាំកម្ពុជា ដែលបានជួបគ្នាកន្លងមក លើនយោបាយផ្លូវមួយខ្សែក្រវ៉ាត់មួយ និងផ្លូវសូត្រ ដែលកម្ពុជាបានយល់ឃើញថា នេះជាចរន្តនៃការពង្រីកសក្តានុភាពសេដ្ឋកិច្ច មិនត្រឹមតែកម្ពុជានោះទេ គឺទាំងក្នុងតំបន់ និងពិភពលោក ។
ជាមួយគ្នានោះ លោកស្រីប្រធានប្រតិភូខេត្តហ្វូចៀន បានកត់សំគាល់ថា មុននឹងប្រតិភូមកដល់កម្ពុជា សាលាខេត្តហ្វូជៀន បានបង្ហាញរបាយការណ៍ក្រៅផ្លូវការថា មានអ្នកវិនិយោគ ទាំងខ្នាតធំ និងមធ្យម ចំនួនជិត៤០ក្រុមហ៊ុនបានចុះបញ្ជីនៅសាលាខេត្តហ្វូជៀន ដើម្បីសុំមករកស៊ីនៅកម្ពុជា ក្នុងទំហ៊ំទុនវិនិយោគប្រមាណជិត៤០០លានដុល្លា ។
លោកស្រី ឡេ ជុនម៉ី បន្តថា ទោះជាយ៉ាងនេះក្តី តែអ្នកវិយោគទុនខេត្តហ្វូជៀន ក៏មានចំនួនពីរ ឬបីក្រុមហ៊ុន បានកំពុងរកស៊ីនៅកម្ពុជា ក្នុងទំហំទុនវិនិយោគជាង៥០០លានដុល្លារ ក្នុងនោះរោងចក្រផលិតដំណាប់ស្វាយ ដ៏ធំមួយនៅខេត្តកំពង់ស្ពឺ កំពុងដំណើរផលិត ដោយប្រមូលផ្លែស្វាយពីកសិករកម្ពុជា ដើម្បីនាំធ្វើការនាំចេញទៅកាន់ប្រទេសចិន ។
លោកស្រី ម៉ែន សំអន និងលោកស្រី ឡេ ជុនម៉ី បានគាំទ្រ និងឯកភាពថា មិនត្រឹមតែធ្វើការទំនាក់ទំនងក្នុងកំរិតថ្នាក់ដឹកនាំ និងថ្នាក់ដឹកនាំប៉ុណ្ណោះទេ គឺត្រូវធ្វើគ្រប់វិស័យ គ្រប់កំរិត ពិសេសរវាងប្រជាជន និងប្រជាជន ដោយត្រូវផ្លាស់ប្តូរព័ត៌មានពីគ្នាទៅវិញទៅមក ដើម្បីស្វែងរកកិច្ចសហប្រតិបត្តិការជាក់ស្តែងឲ្យបានជាប់ជាប្រចាំលើវិស័យសេដ្ឋកិច្ច ពាណិជ្ជកម្ម កសិកម្ម ព្រមទាំងវិស័យផ្សេងៗទៀត ។
ទន្ទឹមនឹងនេះ លោកស្រី ឡេ ជនម៉ី បានគោរពអញ្ជើញលោកស្រី ម៉ែន សំអន ដើម្បីដឹកនាំគណៈប្រតិភូទៅធ្វើទស្សនកិច្ចនៅខេត្តហ្វូចៀន ផងដែរ ។
ជាការឆ្លើយលោកស្រី ម៉ែន សំអន បានយល់ព្រម តាមពេលវេលាសមស្របណាមួយ ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!
