រដ្ឋមន្ត្រីក្រសួងផែនការ ចុះត្រួតពិនិត្យ តាមដាន និងវាយតម្លៃការកំណត់អត្តសញ្ញាណកម្មគ្រួសារក្រីក្រក្នុងអំឡុងពេលកូវីដ១៩ នៅស្រុកវាលវែង ខេត្តពោធិ៍សាត់
នៅថ្ងៃទី២៧ ខែកក្កដា ឆ្នាំ២០២០ លោក ឆាយ ថន រដ្ឋមន្ត្រីក្រសួងផែនការ បានអញ្ជើញដឹកនាំគណៈប្រតិភូចុះត្រួតពិនិត្យ តាមដាន និងវាយតម្លៃការកំណត់អត្តសញ្ញាណកម្មគ្រួសារក្រីក្រក្នុងអំឡុងពេលកូវីដ១៩ និងការដកហូតបណ្ណសមធម៌ពីគ្រួសារដែលមានជីវភាពប្រសើរឡើង នៅឃុំអន្លង់រាប ស្រុកវាលវែង ខេត្តពោធិ៍សាត់ ។
ប្រតិភូអមដំណើររួមមាន លោក ថេង បញ្ញាធន ប្រតិភូរាជរដ្ឋាភិបាលកម្ពុជាទទួលបន្ទុកអគ្គនាយកផែនការ លោកជំទាវ ម៉ែន ផល្លី អភិបាលរង នៃគណៈអភិបាលខេត្តពោធិ៍សាត់ គណៈប្រតិភូក្រសួងផែនការ ប្រធានមន្ទីរផែនការខេត្តពោធិ៍សាត់ បាត់ដំបង កំពង់ឆ្នាំង និងអភិបាល អភិបាលរងស្រុក ក្រុមប្រឹក្សាឃុំ មេឃុំ អជ្ញាធរមូលដ្ឋាន ព្រមទាំងមន្ទីរជំនាញពាក់ព័ន្ធចូលរួមផងដែរ។
ក្នុងដំណើរបេសកកម្មនេះ លោករដ្ឋមន្ត្រី ឆាយ ថន បានសំណេះសំណាលជាមួយក្រុមប្រឹក្សាឃុំអន្លង់រាប ក៏ដូចជាធ្វើការសំណូមពរដល់រូបគាត់ ធ្វើយ៉ាងណាជួយខិតខំយកចិត្តទុកដាក់ដើម្បីឱ្យប្រជាពលរដ្ឋក្នុងឃុំ មានជីវភាពធូរធារប្រសើរឡើង មិនត្រូវប្រកាន់បក្សពួក ជាពិសេសជួយគ្រួសារដែលក្រីក្រពិតប្រាកដ និងដកចេញគ្រួសារដែលមានជីវភាពប្រសើរឡើងចេញ ដើម្បីភាពសុខដុមក្នុងភូមិឃុំ ស្របតាមនីតិវិធីនៃការកំណត់អត្តសញ្ញាណកម្មគ្រួសារក្រីក្រ។
ក្នុងឱកាសនេះដែរ លោករដ្ឋមន្ត្រី ក៏បានអញ្ជើញពិនិត្យមើលការសម្ភាសន៍ជាក់ស្តែងនូវគ្រួសារថ្មីដែលបានដាក់ពាក្យស្នើសុំ ជាពិសេសលោក បានចុះសំណេះសំណាល ក៏ដូចជាធ្វើការកោតសរសើរ ថ្លែងអំណរគុណនូវសណ្តានចិត្តរបស់អតីតគ្រួសារក្រីក្រមួយ ដែលគាត់មានជីវភាពប្រសើរឡើង ហើយគាត់បានដាក់ពាក្យទៅឃុំដើម្បីដកបណ្ណសមធម៌ពីគាត់ ដើម្បីទុកឱកាសជូនគ្រួសារក្រីក្រថ្មី ដែលមានជីវភាពលំបាកជាងគាត់ ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!