លោក គង់ មុនីកា សម្ដែងការសោកចំពោះនីតិវិធីនៃការចាប់ខ្លួនលោក រ៉ុង ឈុន និងលោក សួង សោភ័ណ្ឌ
ប្រធានគណបក្សឆន្ទៈខ្មែរ លោក គង់ មុនីកា សម្ដែងការសោកចំពោះនីតិវិធីនៃការចាប់ខ្លួនលោក រ៉ុង ឈុន និងលោក សួង សោភ័ណ្ឌ ក្រោយអ្នកទាំងពីរលើកឡើងបញ្ហាព្រំដែនរវាងកម្ពុជា និងវៀតណាម ។
លោក គង់ មុនីកា បង្ហាញការសោកស្ដាយបែបនេះ នៅព្រឹកថ្ងៃទី ២៥ ខែសីហា ឆ្នាំ២០២០ ក្នុងកិច្ចប្រជុំប្រចាំឆមាសលើកទី៤ របស់ឧត្តមក្រុមប្រឹក្សាពិគ្រោះ និងផ្តល់យោបល់ ក្រោមវត្តមានចូលរួមរបស់ប្រមុខរាជរដ្ឋាភិបាល លោកនាយករដ្ឋមន្ត្រី ហ៊ុន សែន ។
លោក គង់ មុនីកា បានថ្លែងយ៉ាងដូច្នេះថា ៉គណបក្សឆន្ទៈខ្មែរ សូមសម្តែងការសោកស្តាយចំពោះនីតិវិធីនៃការចាប់ខ្លួនលោក រ៉ុង ឈុន លោក សួង សោភ័ណ្ឌ និងភាពខ្វះសន្តិវិធីចំពោះការធានាសន្តិសុខ សណ្តាប់ធ្នាប់របស់អាជ្ញាធរតទល់នឹងក្រុមអ្នកតវ៉ាទាមទារអោយមានការដោះលែងលោក រ៉ុង ឈុន ៉ ។
ប្រធានគណបក្សរូបនេះ បន្តថា លោក រ៉ុង ឈុន និងលោក សួង សោភ័ណ្ឌ មិនអាចជាគ្រោះថ្នាក់ធំដុំចំពោះស្ថេរភាពនៅកម្ពុជាឡើយ ដោយលោក គូសបញ្ជាក់ថា លោក រ៉ុង ឈុន លោក សួង សោភ័ណ្ឌ និងយុវជនទាំងនោះ គឺជាអ្នកជួយបង្ហាញពីលំហប្រជាធិបតេយ្យ លំហសិទ្ធិមនុស្ស នៅកម្ពុជាទៅវិញទេ។
ទាក់ទិននឹងបញ្ហាព្រំដែននេះដែរ លោក គង់ មុនីកា បានចោទជាសំណួរថា ការប្រកាសប្រើប្រាស់ផែនទីខ្នាត ១/២៥០០០ កាលពីពេលថ្មីៗនេះ តើគណៈកម្មាការជាតិទទួលបន្ទុកកិច្ចការព្រំដែន ឬរាជរដ្ឋាភិបាល គួរតែធ្វើការបង្ហាញជាសាធារណៈ ឬនៅចំពោះមុខអង្គនីតិបញ្ញត្តិដែរឬទេ? ។
លោក មុនីកា លើកឡើងថា គណបក្សឆន្ទៈខ្មែរ ក៏ដូចជាប្រជាពលរដ្ឋខ្មែរទាំងអស់ ចង់ឃើញការបោះបង្គោលព្រំដែនបញ្ចប់១០០% ប៉ុន្តែក៏ចង់បានការពន្យល់ផងដែរថា តើការសម្រួលខ្សែព្រំដែនដែលជាចំណុចប្រជាជនខ្មែររស់នៅច្រើន “ត្រូវស្ថិតនៅខាងខ្មែរ” ឯចំណុចប្រជាជនវៀតណាមរស់នៅច្រើន “ត្រូវស្ថិតនៅខាងវៀតណាម” វាមានផលប៉ះពាល់ទៅនឹងប្រវត្តិសាស្ត្រ ប្រជាសាស្ត្រ និងខ្សែព្រំដែនរដ្ឋបាលចាស់យ៉ាងណាខ្លះ? ៕
រាល់់ការបញ្ចេញមតិរបស់លោកអ្នក សូមប្រកបដោយក្រមសីលធម៌!