លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុតិ្តធម៌  បានចេញមកច្រានចោលការផ្សាយបំភ្លៃថា មានការចែកប័ណ្ណ ដែលអនុញ្ញាតឲ្យទៅផ្សារទិញស្បៀងអាហារបាន ក្នុងតំបន់ក្រហម អំឡុងពេលអនុវត្តវិធានការបិទខ្ទប់ និងរឹតបន្តឹងការធ្វើដំណើរ ។

លោក គឹម សន្តិភាព បានបញ្ជាក់ថា  នៅក្នុងតំបន់ក្រហមមិនអនុញ្ញាតឲ្យមានការទៅផ្សារទិញស្បៀងនោះទេ ហើយការដោះស្រាយស្បៀងដល់មុខផ្ទះ គឺជាតួនាទីរបស់ក្រសួងពាណិជ្ជកម្ម និងអាជ្ញាធរមូលដ្ឋាននីមួយៗ។

អ្នកនាំពាក្យក្រសួងយុត្តិធម៌រូបនេះ  បានបន្ថែមទៀតថា មានតែមូលហេតុសុខភាពបន្ទាន់  យកសំណាក និងចាក់វ៉ាក់សាំងប៉ុណ្ណោះ ដែលអាចអនុញ្ញាតឲ្យចេញពីផ្ទះបាន សម្រាប់តំបន់ក្រហម ។

សូមជម្រាបថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា  នៅថ្ងៃទី១៩ ខែមេសា ឆ្នាំ២០២១ បានបញ្ជាឲ្យអាជ្ញាធរ កំណត់តំបន់ដែលមានការឆ្លងរាលដាលធ្ងន់ធ្ងរ នៃជំងឺកូវីដ-១៩ នៅក្នុងទីតាំងភូមិសាស្ត្រ ដែលត្រូវបានបិទខ្ទប់ជា «តំបន់ក្រហម» ដោយហាមឃាត់ការធ្វើដំណើរចេញ ចូល និងសកម្មភាពនានាទាំងឡាយ លើកលែងតែមូលហេតុពាក់ព័ន្ធសេវាសុខាភិបាល ប៉ុណ្ណោះ ៕